Chik: Ek Purus’ ya o istrizha pe Anashaw haw Kal’s’a moc kia karin?

Chik: Ek Purus’ ya o istrizha pe Anashaw haw Kal’s’a moc kia karin?

Purus' pe anashaw:

Ek Purus’ pe anashaw haw tasa cho zhe bio thi prus’t’ kai uzhuleny.

Chikani Dasturi Krom Khen Hin?

Kas dura pe ek mocas at’hi dras’naw haw sawin pe s’umber tasa cho zhe bio, groumani purus’, istrizha zhe, tasa mocas deshai auzha sarian. Tara pe sariny haw to ugaen karin, taley pist’aw o tasa sano karin. Sano kai bianyak drasnahik wewo phato ek topek dras’neny.

1. Khen kay sano karin?

Sano karikas phond shehen ki tasa nashaw as awel echo’yak gri bonin. Tal’ay pist’aw o tasa kal’un, kas’ong, cish, chapan zhe mod’il’a piran san’bian. 

2. Sano Karikani Pis’t’awo:

At’hi shenuna kai drasnaik wewuna phato tupek drasneny. Toa to at’hi ya ta hand una ya o parai’ una haty harin. Tara pe zhal’an haw istrizha ta bas’keny purs’ o ishtyikhen. Tal’ay pist’aw o deshuna haty suda hutin. Deshani moc pe azhal’an haw te bata shan’shehen kai ishtikhen zhe bas’khen. Tal’ay pest’aw o tasa nashaw as duray moc zhe gromani moc thi marakha karin. Phato deshawan’ay hatya suda hutin. Kia wewouna pe deshawani moc azal’an haw sawin pe ruaw ishtriza ita bas’keinan phato purus’ drasneny zhe ita isht’ken, warek saw moc thi o ko’n’ karin. Talei pist’awo ek cha’ karin gad’erkan ta moc mocuna pai gho’n’ dyeny zhe da’nu ban’neny, istrizha zhe juanan o nat’ karin, talei pis’t’awo te saw kai nisai chamani asta kai au dany, kura pe chamán ne zhuiman ais haw tsa prechona ya o c’hir dany. Tara rhat l’uzha zha ishtyekhany, bas’khen zhe natian. Chopamina pe hawaw haw kocawan hatya taham sawzeny ade moc au zhuikani pis’t;awo deshani zhe deshawani mo thi kocika parin.

3. Khen kai Tohon Sawzen?

Tohon kia ki shew, to rha shul’a gri sawzen. Se moc pe anshaw haw shatara mi chakdikwew tohon asta sawzai thany, kocika pari haw moc to tohon asta tasom mad’awjaw una hatya harin. At’hi gri harikanı s’umber deshawani moc ek thi shura dan’way dyeny. Handani  ya o moc nat’aikeinani gri uphor dyikas jaigauna ek moc ta to l’ac’hia ya o gora lok gri rua hiw baki o tasa pis’t’aw thi nat’ kariman gerdian. Talei pis’t’awo to at’hi gri parin mad’awjaw hatya parin.

4. Uphor Kia?

Kal’as’a moc kura pe kakboy nashai o pe tasa bati yas’ day ais haw shatasa kai Uphor goan. Ego uphor dyikwew tasa kakboyas kia ne kia ishnyahari oni pasheny ek birbat onjes’ta jaigauna koci d’angeny shatara phato kura pe anashaw haw shura dan’way dyeny. 

5. Shura Dan’way 

S’umber baro una Kana nomen ek moc asta se nashi awe to nat’ai aan shatale wajan day o Kanabom ghoan dai. Se virishik gom ay moc asta. Se moc Nashik ani s’umber adesh dai asta ki a ek shor moc gri zhang kai am, a pe anashis haw my bati shura dan’way s’t’a. Ek shor  

moc thi tre pundori my at’hi as pundorak gera. A zhang una ek nis’an thai ais shatasa kai mal’wat ghoan. To mal’wat thai wew se moc s’aun dai ais tasa Jostuna ek o gon’dik cist’ay ais, ta kai o kha’a’ gon’dik ghon’iman aini. Taley pis’t’awo kura moc ya o kakboy pe nashaw haw phato se mal’wat thal mal’s’aun dal. Taley pis’t’awo shura dan’away dek shurok hawaw.  

6. Pachan Karikas Tarika:

Shura Dan’way dyikani pis’t’awo tasa mocas cho, bio zhe dimiani moc thi akheri nat’in, bas’ken, troin zhe tas kai khodyar karin topeken teny, phato te moc to shen upray mad’aw jal’una hatya harin. 

7. Khushurik Khen Kai Karik?

Pachan karikas watuna ek moc ya o istrizha kas beuras nashaais haw ya o pe jaas. Nashais haw shase kushurik kariu, ek kamuc’ak gum at gri kushurik karin, kushurik kayo ek batyasotik kay adhek chamni asta kai ego Ji Thomas asta kay tasa kha’wi bazauna to traku zhe batonyak dany dran’c’ui bazauna o batyostik kusharik zhe chamani o cnal’ai dany, pachan karikain pis’t’awo tasa samana som te moc kura ki tara parinday tichak kushurik zhe chamani histaman parin. 

8. Khal’aikas Bati Koci’kas Dastur?

Har Kal’as’a gromas tan tan mad’aw jaw shian tara bata har dimias tana tana jaiga shian. Tasi kacuyan som dany ek moc pariu, tasi pashal to jaiga kawa ki kuceli phato te moc kura ki Kocika payan shate kacin Kal’as’a moc s’umber s’at’i s’is’ suri biotik gehenaw kai khal’en khur o suri nyik gehenaw karin. 

9. Istrizha Pe Anashaw Haw 

Istrizhaas bati da’nu ne bhanjaw. Ishtyikhek zhe bashikek o hiu. Kia watuna pe bahaga una ahiran haw tara to tasa moasi gehenaw moc to at’hi bahagai uchundan tal’ai uchundai tasa dranc’ui bazauna ta traku zhe batonyak dany, khaiwi bazauna a o batyostik tal’ai kushurik zhe chamani dyany. Phato to bahagani dur mek dyai band karin, tara thara o phaw dyai band kairkani pis’t’awo moc sida gromay hatya ne parin. Kaw ki s’oi uk shiaw shatara ita saw thi tre tre chat uk bazauna dyai nigi to gromuna hatya parin. 

10. As’is’a Purus’ ya o Ishtizha pe Anashaw haw?

As’s’a Istrizha ya o purus’ pe s’unguna ais haw, shatara watuna pe anashaw haw tasa sano ne kan, shatara watuna zhe bas’keny ne mio deshani ya o Deshawan’aw moc khojin to khal’aikani pes’t’aw mocas bati to sh’a bati karin. Istrizhaas bati khali yas’ dyeny, khal’aikwew asta tasi bati mad;aw jal’una gezhi jaiga hiu ki te khal’ailik hiu. 

11. Gos’nik ne gada sudayak Nashikas Dastur?

Chutyak suda kas kas ki gos’nik/wen’s’ ne kai aan, shatara watuna pe anshaw haw, sha tasa sudyakas asta sano ne karin, ne o tasa bati bujus’anaw deny, khali pachan kayo pe on haw tasi chamni zhe au deny. Geri tasi mewa asta deny. Tasa bati shok o karin. Gosnik ne gada sudayk pe anshaw haw tasa bati s’is ne baden, khali nigi shok o karin. 

12. Istrizha Bashal una nashakas Dastur?

Kura istrizha pe Bashaluna pe anashaw haw tasa asta sano ne karin, tasa bati yas’ asta ne dyen to at’hi kura pachan karika parin haw to khal’aken pis’t’aw te gromay parik ne baan. Kia watuna ki te wazi warek cew bew san’bik ani pis’t’aw o tasi bati batyak mari istongas karin phato gromuna hatya parin. Tara pay au zhun, talei pis’t’aw o tasi bati yas’ deny. Chutak sudayak pe Bashal una ne thaw hawaw haw tasa bati shok ne karin. 

13. Shok Kari Kas Dastur?

Kura moc ya o Istrizha pe anashaw haw, te pachan karikani rat deshani zhe deshawan’ani moc suja rat nisin muskulgi karin. Chopamina o kushurik histikani pes’t’aw deshawan’ani moc ta parin deshani zhe gromauni cho zhe bio tara sari deshani cho zhe bio an s’is badeny shatara chopamina ek zandar mari s’is badek karin, kura ta s’is badeny kura o khali s’is nigin. Talei pes’t’aw o moc ta chong thawin, istrizha o kupas san’bian.

14. Push Muc’a Dikas Dastur?

Chikani pes’t’awo moc geri khawsangaw una zha shok karin. Khawasanga ani ek bas s’umber Bhand’awaw ita tasi kai maw ki chopamina o shok cenli ghon’i talei pes’t’aw talei duray moc zhe tasa cho zhe bio thi tasi mocan hatya taham pachen. Chopamina o deshani moc ita tasi cho zhe bio an push muc’a deny. Geri te moc ita duray mocan adesh karin ki abi ajo tan c’hetr sendik ay pai krom kara zhe koshan apak det. Phato tasi mocan chamni asta kai au dieli.

15. Madaik 

Kal’as’a moc pe anashan haw to pachan karikani pis’t’w o, mad’awjal’ una ne parin, ne wesn’ ghoan’. Kal’an ek chat' Cawmos una Madaik as dastur karin, shaya adua s’umber watuna pura adua hozha kai awaz ne chal’ahiman ainyi. Saw duray gad’a bas’irakan hatya dustari taham pachen. Phato te taham du bas’ kai ek ta dura theny, ego Hand una hatya harin. Tara hand una asta tayari karin. Bian durgat’ tada kai l’ucakan thara kot’ binin zhe s’us’t’a dra’n’u tasa kot’as nasen theny. Kas dimias pe hand ne ashinyi haw te durami kai madaik karin, phato undrimana hand ay saw taham sawzai tayar karin. Handun bata ek sawewani taham o biana tasa kot’as tada thany. Photo dimiani ek moc biana dras’ni hozha kai khond’i dal. Ew ei gad’a bas’erakan ita zhui zhe pio para. Toa se moc handuna pe ataw haw l’ucak s’at’ai hukasta ne kai apaw dany. Adek wat pis’tawo to dur unpreny bianai to sawew asta udreman ateny to sawew dur gat’ tada thany buchumako ne harin. Bianai onil’a sawewani tahamo bashalei ne gal’a istrizha guak khali zhun gad’a leio ne zhun. Photo te taham sawin kai phazhi dany.