Gul Parik Kai Parin?

Sudayak as ayas s'is sucek

Gul Parik

Kal’as’a sudayak upujaw pe haw istrizha gu’a’k ya o purus’ gu’a’k hiw day tasi awduin gul parik hiw. Gul Parik no’a push ghri parin. 

Gul Parik Kai Parin?

Gul Parik zhoshouna parin.

Gul Parik, Parikas Maksat:

Kas istrizha pe gu’a’k upujaw haw se onjest’a whan’ay ne pariu.

Onjest’a Whan’ Kas Kai Ghoan 

Istrizha gos’t’ dramia ne parin, zhayay buchum ne parin, pay ghos’t’ay udriman ne atin, ghaay bhuchumak ne parin. 

Gul Parik Ani S’umber:

Gul parik ani s’umber istrizha newes’ whan’ai’ ne pariw. Sudayak asta onjest’a whan’ay ne nin. 

Gul Parik Parikas Abel’

Zhoshuna hatya adhe wat pe thaw haw hawal’ haw, gul parik kho’n’ias hatya no’a cew, patti. S’us’utr gul parik patyak sawzeny. Sudayakas hatya asta har rhuyakan ma’ik dyai gul parik khu’ zhe cel’ikik sawzeny.

S’is’au 

 Gul Parik kho’n’ian s’ingba’i copa s’isau  suceny. Gul Parik Kho’n’ian zhoshi copa rages’t’i tayar thi sudayak asta tayar kariw.

No’a Sudayakas Bas’

No’a sudayakas nomuna mashustyak zhe bribo ghrohonya kai dyai o tal’ai tharai o bribo po’n’ zhe bis’a po’n’ dyai phato gul parik parin. 

Bribo She Bis’a Po’n’

Bribo po’n’ bis’a po’n’ ghrohonyak tharai zhe d’ando’ay dikas maksat:

Shenen ki te tal’ai paron haw no’a push as nis’ani, gul parik copa istrizha tayar thi cew san’biaw, carusti san’bio se tal’ai carustia c’ac’ooni c’han’ci tal’ai d’ando’ay bribo po’n’ zhe bis’a po’n’ dyai o se gul parik pariw. Gul parik copa purus’ ek sawel’ik una bribo zhe mashushtyak dyai o ego shuman thara thai ghrom dewayak una pai saras dyai suhal karin.

C’hir Histik

Saw Kal’as’a istrizha zhe sudayak thi ek awata sarian phato ek purus’ pay dhui o saw istrizhon thara c’hir histiw. Sudayakan o gul parik kho’a’k san’biai o c’hir histin. Gul parik kho’n’ian o Shuman ga’ay dyen.

C’hir histik ani pes’t’awo 

Gul parik kho’n’ian kai sa’n’pa’n’ut karin, saw gul parik kho’n’ian c’hir histik ani pes’t’awo istek istek citroyak ga’ay dyen. Toa phato mashushtyak zhe bribo phazhi saw ghrom una awizhan deny, saw thi gul parik kho’n’ian bas’ dhario duray hay thai o phato zhoshi karika parin.